ການປະທ້ວງຂອງກຸ່ມນັກສຶກສາໃນບັງກະລາເທດຮຸນແຮງຂຶ້ນ ມີຜູ້ເສຍຊີວິດຫຼາຍເຖິງ 133 ຄົນ!

ເກີດຫຍັງຂື້ນໃນບັງກະລາເທດ? ບັງກະລາເທດກຳລັງຢູ່ໃນສະຖານະການຮຸນແຮງ ເນື່ອງຈາກການປະທ້ວງຂອງນັກສຶກສາເພື່ອຕ້ານລະບົບໂຄວຕ້າການເຮັດວຽກລັດຖະການ ໄດ້ທະວີຄວາມຮຸນແຮງຂຶ້ນເປັນຄວາມບໍ່ສະຫງົບທົ່ວປະເທດ. 

ຜູ້ປະທ້ວງຈູດໄຟເຜົາສຳນັກງານໃຫຍ່ຂອງສະຖານີໂທລະພາບແຫ່ງລັດ ບັງກະລາເທດເທເລວິຊັນ (BTV) ຫຼັງຈາກທີ່ຕຳຫຼວດຍິງລູກປືນຢາງໃສ່ຜູ້ຊຸມນຸມ. ຈຳນວນຜູ້ເສຍຊີວິດເພີ່ມຂຶ້ນເປັນຢ່າງໜ້ອຍ 133 ຄົນ ໂດຍທີ່ຕຳຫຼວດໄດ້ຮັບຄຳສັ່ງໃຫ້ຍິງທັນທີທີ່ເຫັນ ແລະທາງການໄດ້ສັ່ງປິດອິນເຕີເນັດເກືອບທັງໝົດເພື່ອຄວບຄຸມການປະທ້ວງ. ທີ່ມາຂອງການປະທ້ວງ ການປະທ້ວງເລີ່ມຕົ້ນຂຶ້ນໃນມະຫາວິທະຍາໄລ ໂດຍນັກສຶກສາອອກມາຕໍ່ຕ້ານລະບົບໂຄວຕ້າທີ່ສານສູງສຸດຫາກໍອະນຸມັດໄປ, ເຊິ່ງສະຫງວນຕຳແໜ່ງໃນວຽກລັດຖະການ ຍົກຕົວຢ່າງເຊັ່ນ ຕຳແໜ່ງວຽກ 30% ຖືກສະຫງວນໄວ້ສຳລັບທະຫານຜ່ານສົງຄາມ ແລະຍາດພີ່ນ້ອງຂອງຜູ້ທີ່ເຂົ້າຮ່ວມໃນສົງຄາມປະກາດອິດສະຫລະພາບຂອງບັງກະລາເທດໃນປີ 1971. ຄຳຕັດສິນໃໝ່ຂອງສານສູງສຸດຍັງກຳນົດວ່າ ມີພຽງແຕ່ 5% ຂອງຕຳແໜ່ງງານຈະຖືກສະຫງວນໄວ້ສຳລັບລູກຫລານຂອງນັກສູ້ເພື່ອເສລີພາບ ແລະອີກພຽງແຕ່ 2% ສຳລັບຜູ້ທີ່ມາຈາກຊົນກຸ່ມນ້ອຍ ຫຼືຜູ້ພິການ. ນັກວິຈານລະບົບນີ້ກ່າວວ່າເປັນການເລືອກປະຕິບັດ ແລະເປັນປະໂຫຍດຕໍ່ຜູ້ສະໜັບສະໜູນຂອງນາຍົກລັດຖະມົນຕີ Sheikh Hasina ຜູ້ທີ່ຢູ່ໃນອຳນາດຕັ້ງແຕ່ປີ 2009 ແລະປະຈຸບັນຖືກກ່າວຫາວ່າປົກຄອງແບບຜະເດັດການ

ການທະວີຄວາມຮຸນແຮງ

ການກັບມາຂອງໂຄວຕ້າ (ທີ່ຫາກໍຖືກຍົກເລີກໄປໃນປີ 2018) ໄດ້ຈຸດປະກາຍໃຫ້ເກີດການປະທ້ວງ ແລະຄວາມໂກດເຄືອງຢ່າງກວ້າງຂວາງໃນຫມູ່ນັກສຶກສາ ທີ່ອ້າງວ່າໂຄວຕ້າເຫລົ່ານີ້ໃຫ້ປະໂຫຍດຢ່າງບໍ່ເປັນທໍາກັບພັກການເມືອງອາວາມີ (ກໍ່ຕັ້ງໂດຍຜູ້ທີ່ຕໍ່ສູ້ໃນສົງຄາມປະກາດອິດສະຫລະ). ການປະທ້ວງທີ່ເລີ່ມຕົ້ນຢ່າງສະຫງົບໃນມະຫາວິທະຍາໄລ ໄດ້ແຜ່ລາມເປັນຄວາມບໍ່ສະຫງົບທົ່ວປະເທດ. ຜູ້ຊຸມນຸມປະທະກັບຕຳຫຼວດ ແລະຄວາມຮຸນແຮງໄດ້ສົ່ງຜົນໃຫ້ມີຜູ້ເສຍຊີວິດ ແລະບາດເຈັບຈຳນວນຫລາຍ, ມີລາຍງານວ່າການໃຊ້ອາວຸດຂອງຕຳຫຼວດເປັນສາເຫດຂອງການເສຍຊີວິດຫລາຍລາຍ. ລັດຖະບານໄດ້ຕອບສະໜອງດ້ວຍການປິດໂຮງຮຽນ ແລະມະຫາວິທະຍາໄລຢ່າງບໍ່ມີກຳນົດ ແລະເພີ່ມຄວາມເຂັ້ມຂັດໃນການຄວບຄຸມສະຖານະການຂອງຕຳຫຼວດ. ການຕອບສະໜອງຂອງລັດຖະບານ

ນາຍົກລັດຖະມົນຕີ Sheikh Hasina ໄດ້ກ່າວຕໍ່ປະຊາຊົນ ຮ້ອງຂໍໃຫ້ເກີດສັນຕິພາບ ແລະຫຼຸດຄວາມຮຸນແຮງຂອງການປະທ້ວງ, ພ້ອມປະນາມຄວາມຮຸນແຮງທີ່ເກີດຂຶ້ນ. ເຖິງວ່າການນາຍົກລັດຖະມົນຕີຈະອອກມາກ່າວ ແຕ່ການປະທ້ວງຍັງຄົງຂະຫຍາຍຕົວຂຶ້ນ, ໂດຍຜູ້ຊຸມນຸມຮ້ອງຂໍໃຫ້ນາຍົກລາອອກ ແລະຂໍຄວາມຍຸດຕິທຳໃຫ້ກັບຜູ້ທີ່ເສຍຊີວິດ. ລັດຖະບານໄດ້ສັ່ງປິດອິນເຕີເນັດເກືອບທັງໝົດເພື່ອຂັດຂວາງການສື່ສານ ແລະການປະສານງານຂອງຜູ້ປະທ້ວງ. ຄວາມກັງວົນດ້ານສິດທິມະນຸດ

ກຸ່ມສິດທິມະນຸດໄດ້ປະນາມລັດຖະບານທີ່ປາບປາມຜູ້ເຫັນຕ່າງ ແລະໃຊ້ສະຖາບັນຂອງລັດໃນທາງທີ່ຜິດເພື່ອສົ່ງເສີມອຳນາດຂອງຕົນ. ລາຍງານກ່ຽວກັບການການສັງຫານນອກຂະບວນການຍຸດຕິທຳຂອງນັກກິດເຄື່ອນໄຫວຝ່າຍຄ້ານ ແລະການປາບປາມສື່ມວນຊົນ ໄດ້ເພີ່ມຄວາມບໍ່ພໍໃຈໃຫ້ປະຊາຊົນຫຼາຍຂຶ້ນ. ສະຫະປະຊາຊາດໄດ້ຮ້ອງຂໍໃຫ້ທຸກຝ່າຍໃຊ້ຄວາມລະມັດລະວັງ ແລະສົ່ງເສີມການເຈລະຈາເພື່ອແກ້ໄຂວິກິດນີ້ຢ່າງສັນຕິວິທີ.

ການປະທ້ວງໃນບັງກະລາເທດໄດ້ຊີ້ໃຫ້ເຫັນຄວາມຈຳເປັນທີ່ຮີບດ່ວນສຳລັບການສົນທະນາ ແລະການປະຕິຮູບ. ອົງການສາກົນ ແລະກຸ່ມສິດທິມະນຸດກຳລັງຂໍ້ຮ້ອງໃຫ້ລັດຖະບານບັງກະເລດແກ້ໄຂບັນຫາທີ່ຜູ້ປະທ້ວງຮຽກຮ້ອງ ແລະຮັບຮອງຄວາມຍຸດຕິທຳໃຫ້ກັບຜູ້ທີ່ຖືກຜົນກະທົບຈາກຄວາມຮຸນແຮງ.  #WeAreManushyan  Equal Human Beings #BangladeshCrisis #StudentProtests #EndTheViolence #HumanRights #JusticeForProtesters